ROEDD achos dwbl i ddathlu pan ymunodd cynulleidfa Bethania, Aberteifi, â thrigolion Cartref Glyn Nest i gynnal oedfa ddiolchgarwch am y cynhaeaf yn ddiweddar.
David Peregrine oedd wrth yr offeryn ac yr oedd y Sul hwn yn un arbennig yn ei hanes gan mai hanner can mlynedd yn union yn ôl y cychwynnodd ar ei waith fel un o organyddion Bethania.
Ond roedd yna gyd-ddigwyddiad arall, oherwydd mai’r Parch Islwyn Davies, sydd bellach yn preswylio yng Nglyn Nest, ac yn bresennol yn yr oedfa, oedd yn gwasanaethu ym Methania ar y Sul cyntaf o Hydref 1968.
Felly gwelwyd y ddau yn yr un oedfa hanner canrif yn ddiweddarach. Yn ystod yr oedfa canwyd yr emyn-dôn ‘Preseli’ o waith y ddiweddar Joan Osborne Thomas, sef yr un ysgogodd David i gychwyn fel organydd.
Llywyddwyd y gwasanaeth gan y gweinidog,y Parch Irfon C Roberts a phregethwyd ganddo ar y testun ‘Chwi yw halen y ddaear’.
Bu Glenys Jones, Mair Morris, Elfair James a Rhidian Evans yn cynorthwyo drwy ddarllen o’r ysgrythur, gweddïo, adrodd a chanu a braf o hyd yw clywed lleisiau’r deiliaid yn ymuno.
Diolchwyd i bawb am yr oedfa gan Jean Thomas a Freda Pierce ac ar ei chais ymunwyd i ganu emyn arall cyn diweddu ac yna cafwyd cyfle i sgwrsio’n hamddenol a chael lluniaeth flasus fel arfer.
Y Sul canlynol, a hithau’n oedfa gymun ym Methania cafodd yr eglwys gyfle i anrhydeddu a diolch i David Peregrine am eu ffyddlondeb wrth yr organ ers hanner canrif yn ddi-dor.
Cyn gweinyddu’r cymun galwodd y Parch Irfon Roberts David ymlaen i dderbyn cyfarchion yr eglwys a rhodd o gerdd wedi ei fframio o waith bardd lleol, Ken Griffiths,Y Graig. Gofynnwyd iddo ddarllen ei waith cyn cyflwyno’r rhodd:
Am ichi yn ddiamod
Roi crefydd ym mhob cân,
Gan gyfoethogi’r emyn
 gwres y dwyfol dân,
Ac wrth i’r nodau ddisgyn
Mor bersain ar ein clyw,
Mi fedrwn ninnau dystio
Eich bod yn was i Dduw.
Oherwydd ffyddlondeb David at bob agwedd o waith yr eglwys bu’n dipyn o gamp i gadw’r gyfrinach ond fe lwyddwyd ac wedi iddo ddod dros y syndod fe ymatebodd gan ddiolch am y cyfle i fod yn organydd ac am y gydnabyddiaeth.
Yn ogystal diolchodd y gweinidog i Mair Wilson a Rhidian Evans am eu cyfraniad hwy fel organyddion gan nodi nad oes yr un Sul ers iddo ddod yn weinidog i Fethania heb fod rhywun wrth yr offeryn.
Llongyfarchiadwyd i David Peregrine a diolchwyd hefyd fod yna bobl o hyd sydd yn barod i roi o’u hamser a’u doniau i'r achos.
Comments: Our rules
We want our comments to be a lively and valuable part of our community - a place where readers can debate and engage with the most important local issues. The ability to comment on our stories is a privilege, not a right, however, and that privilege may be withdrawn if it is abused or misused.
Please report any comments that break our rules.
Read the rules here